Góð blanda....

Litli frændinn leit dagsins ljós 20. febrúar kl. 1:30 í Svíþjóð. Mamma er frá Búrúndi, sem sagt Jörð í Afríku,pabbinn Íslendingur og svo er barnið fættí Svíþjóð. Eitthvað er ég hrædd um að íslenska ættfræðin þyrfti að færa út kvíarnar til að ná þessu.  En strákurinn er heilbrigður og flottur og það er fyrir öllu. Til hamingju.

Fjölskyldan er orðin svo stór og það virðist hreint ekkert lát því. Fyrir nokkru hitti ég konu í Bónus og tókum við tal saman og spurðum auðvitað um framkvæmdir í barneignamálum hvorrar fyrir sig. Þá kom á daginn að það var fátt um fína drætti hjá henni, en það var sko alls ekki það sama um mig og mína að segja. Ég stundi því samt upp hver fjöldinn væri orðinn, en bætti því í flýti við, og auðvitað afsakandi, af því að þetta er nú næstum dónalegt, að ég hefði nú ekki gert þetta alltsaman sjálf. Það stóð ekki á viðmælandanum að svara þessu: ,, Þú sáðir fræinu," sagði hún sigri hrósandi.

Ég er bara millistykki í þessum efnum en undir þessu skrýtna yfirborði er ég dálítið stolt af frjóseminni og framkvæmdagleðinni í barneignamálum fjölskyldunnar. Allavega hrópa ég húrra núna og er alsæl.

Heyrumst..............